Pantun Adat Minangkabau

Pantun Nasehat Minang

Panakiak pisau sirawik,
ambiak ka galah batang lintabuang
Silodang jadikan nyiru
Satitiak jadikan lawik
Sakapa jadikan gunuang
Alam takambang jadi guru

Pidato Persembahan Helat Perkawinan
Salah satu bentuk pidato persembahan dalam mempersilakan
untuk makan sirih.

Talatak puntiang di hulu
Di bawah kumpulan tali
Aso mulo kato dahulu
Tigo limbago nan tajadi
Partamo sambah manyambah
Kaduo baso jobasi
Katigo siriah jo pinang
Siriah manyiriah dalam adat
Tali batali undang-undang
Baso baik pulo dibibia
Lorong kapado nan siriahnyo
Carito maso dulunyo
Bijo di baok dari aceh
Di tanam di suduik rumah
Malewai ka pudiang ameh
Manjulai ka suduik atok
Tangkai nan indak panjang amek
Satahun tupai maloncek
Haram ka sampai ka pucuak nyo
Gutia ciek guti dua
Bak itu dek ambun pagi hari
Ma ambuang si ambun sori
Di pilih dek puti Diano
Di simpan di dalam puai
Satahun di dalam puai
Haram kalayu, kusuik pun indak. Kini manjadi kabasaran.
........
Bak pituah urang tuo juo, Dari Pariangan ka Padang Panjang
Manurun ka Pandai Sikek
Kurang Pandai marantang
Ambo babaliak ka nan singkek
Sungguh babaliak ka nan singkek
Indak bak raso ka didulang
pandulang ameh di Palangkih
Indak bak raso ka diulang
diulang juo kato nan tadi
supayo ndak dapek kato nan kudian
Apolah kato nan kudian
tantangan sirih nanko
bukaklah sirih kami
isoklah rokok kami
Cuma sakiannyoh ...